अधिकतम लाभका लागि वास्तुशास्त्र

विश्वकर्मा नामक देवतालाई वास्तुशास्त्रका प्रणेता मानिन्छ । आजको संसारको रचना र प्रत्येक रचनाको उत्कृष्टताको आधार विश्वकर्मा हुन् भन्ने शास्त्रीय मान्यता छ । विश्वकर्मा नै विभिन्न देवपुरका रचनाकार हुन् भन्ने शास्त्रीय आधार छ । भगवान शिव र पार्वती आनन्दले बसिरहेका बेला देवताहरु दर्शनका लागि जाँदै गरेका बेला नन्दी (शिवका बाहन)ले विश्वकर्मालाई वास्तुशास्त्रका विषयमा प्ररित गर्दै शिवको आराधना गर्न लगाएको भन्ने लोकोक्ति छ । विश्वकर्माले शिव स्तुति गर्दै आफूलाई सम्पूर्ण वास्तुशास्त्रको ज्ञान होस् र जगतको हितमा काम गर्न प्रेरणा मिलोस् भनी वरदान मागेको उल्लेख छ ।

विश्वकर्मा वास्तुशास्त्रको दोश्रो अध्यायमा विश्वकर्मा भन्छन् ।

शम्भो जगत्पते नाथ यदि ते मय्यनुग्रहः ।

स्तुत्या प्रसिदसि त्वं मत्कृतया चन्द्रशेखर

वास्तुशास्त्र प्रकाशोऽस्तु मत्चित्ते तव वीक्षात् ।।

‘हे जगतपते यति तपाई मेरो स्तुतिबाट प्रशन्न हुनुभएको हो भने मेरो मन या चित्तमा वास्तुशास्त्रीय ज्ञानको प्रकाश होस् ।! विश्वकर्माले वरदान मागेको थिए । उनले आफूमा देवालय, मानव गृह, विभिन्न शालाहरु, यन्त्र, सवारी साधान या विमान, गोपुर या अन्य पुरहरु लगायत समस्त निर्माणको वास्तुशास्त्रीय ज्ञान होस् भनी वरदान मागेकोले भगवान शिवले विश्वकर्मामा समस्त निर्माणको ज्ञान दिएको भन्ने शास्त्रमा वर्णित छ ।

मदाज्ञया त्वं लोकानां निर्माणादिषु कौशलम् ।

लभस्व च शुभां कीर्ति सर्वलोकहिताय च ।।

भगवान शिवले विश्वकर्मालाई समग्र संसारमा यश प्राप्त गर्दै लोकको हितमा काम गर्न वरदान दिनुभएको उल्लेख गरेको पाइन्छ । शिल्प शास्त्रका रुपमा लिइने वास्तुशास्त्रको समुचित प्रयोगले समस्त लोकमा धर्म, अर्थ, काम र मोक्षको सन्तुष्टि मिल्ने शास्त्रीय मान्यता छ ।

वास्तवमा वास्तुशास्त्रको मूल ग्रन्थको विषयमा विभिन्न मत पाइएपनि पूर्वीय मान्यतामा विश्वकर्मा प्रकाश या विश्वकर्मा वास्तुशास्त्रलाई प्रमुख आधार लिएर कार्य गर्ने गरेको पाइन्छ । देवशिल्पका लागि विश्वकर्माको वास्तुसँगै मय नामक दैत्यले विभिन्न पुर निर्माण गर्दै मयमतको सिर्जना गरेको पाइन्छ । खासगरी विभिन्न पुराणहरुमा पनि वास्तुको विषय चर्चा भएको उल्लेख पाइन्छ । विद्वानहरुका अनुसार मत्स्यपुराण, भविष्यपुराण, गरुडपुराण, नारदपुराण आदिमा वास्तुको उल्लेख भएको छ । गृह वास्तु व्यवस्थामा गर्गसंहिता, वशिष्ठसंहिता, नारदसंहिता जस्ता ग्रन्थहरुले चर्चा गरेको वताइन्छ । यद्यपि समग्र वास्तुशास्त्रको श्रेय विश्वकर्मालाई जान्छ । पूर्वीय वैदिक सनातनमा विश्वकर्मा वास्तुलाई विशेष स्थान दिइएको छ ।

हिन्दु मान्यतामा आधारित अनेक धार्मिकस्थलहरु नै वास्तुशास्त्रका नमूना हुन् । देवालयहरुमा व्यवस्थित वास्तुकलाले विश्वलाई यसक्षेत्रमा आकर्षित गरेको पाइन्छ । सुखी, स्वस्थ र समृद्ध जीवनकालागि वास्तुशास्त्रको अवलम्बन महत्वपूर्ण पक्ष हो । हजारौं वर्ष अघि नै ऋषिमुनिहरुले यसको महत्व र आवश्यकता बुझेर मानव कल्याण हेतु विभिन्न सिद्दान्तहरुलाई व्यवस्थित रुपमा प्रस्तुत गर्दै आए । कोही शिवभक्त थिए र उनीहरु शैव मान्यतालाई जोड दिदै आए भने कोही विष्णुभक्त भएकोले विष्णुमान्यतालाई पछ्याउँदै आए । तान्त्रिक मान्यतामा आगम र निगमको नियमलाई अधिक महत्व दिएका हुन्छन् । जसले जुन मान्यता लिए पनि समग्रमा मानवहितकालागि नै गरिएको छ ।

शिल्पशास्त्र अर्थात् वास्तुशास्त्रमा देवता, राजा र सामान्य मानिसकालागि समान हुँदैन । देव वास्तुमा मठ मन्दिर, देवालयहरु पर्छन् भने राजाहरुकालागि दरवारको निर्माणसँगै कोषागार, शस्त्रागार, कारागार जस्ता कुराहरु समेटिएका हुन्छन् । साधारण मानिसकालािग गृह वास्तुको व्यवस्थापन गरिन्छ । त्यसरी नै वास्तुमा मानिसको वर्ण अनुसार विविधता हुन्छ । ब्राम्हण, क्षेत्री, वैश्य र शुद्र चारै वर्णका मानिसकालागि निर्माण तथा सजावटका फरक फरक विधि र व्यवस्था हुन्छ । विभिन्न स्तम्भहरु, वहाल, टुँडाल, मण्डप तथा अन्य यन्त्र निर्माणमा वास्तुको स्वतन्त्र व्यवस्था रहेको हुन्छ । रथ तथा विमान निर्माणको वास्तुकला फरक हुन्छ । कुनै निर्माणको स्थान, परिवेश, प्रकार र आकार अनुसार वास्तुकलाको विधान व्यवस्था गरिएको छ ।

सबै वास्तुशास्त्रीय मूल सिद्दान्त अत्यन्तै विधिसम्मत् छ । वास्तुले पहिलो शर्त मुहुर्तलाई लिएको हुन्छ । कुनै पनि कार्यकालागि समय सबैभन्दा बलवान हुन्छ । शुभ समय सबै समस्याको निकास र समाधान मानिन्छ । कार्यसम्पन्न गर्नकालागि उत्तम मुहुर्त अनिवार्य हुन्छ । कार्यारम्भ शुभ मुहुर्तमा भएन भने विभिन्न समस्याहरु उत्पन्न हुन्छन् । धनको समस्या उत्पन्न हुनसक्छ । स्वास्थ्यमा समस्या उत्पन्न हुनसक्छ । त्यसैले निर्माण आरम्भ, शिलान्यास गर्दा, द्वार स्थापना गर्दा मुख्यस्तम्भ निर्माण गर्दा, छानो छाउँदा, गृहप्रवेश गर्दा शुभमुहुर्त अनिवार्य हेरिनुपर्छ । त्यसरी नै जलाशय निर्माण गर्दा, पुरानो घर जिर्णोद्वार गर्दा, भवनमा अग्निस्थापना अर्थात् चुल्हो निर्माण र बाल्दा शुभमुहुर्त छनौट गर्नुपर्छ । शिल्प विज्ञानको शुद्धता र त्यसको सुधार एउटा उपाय हो तर शुभमुहुर्तको प्रभाव अधिक रहन्छ । विश्वकर्माले शिल्प निर्माणमा शुभमुहुर्तलाई प्राथमिकतामा राखेको पाइन्छ ।

वास्तुशास्त्रमा कांकिणी विधिलाई पनि विशेष महत्व दिएको पाइन्छ । कुनैपनि स्थान र गृहस्वामीको शुभाशुभ हेर्न यस विधिको प्रयोग गरिन्छ । कुनै देश या जिल्ला, नगर अथवा गाउँ सम्बन्धित व्यक्तिकालागि शुभ छ छैन भन्ने ज्ञात गरेरमात्र निवास निर्णय गरिनुपर्छ । यदि स्थान नै व्यक्तिकालागि शुभ छैन भने त्यो स्थानमा गृह निर्माण गर्नु हानीकारक हुनसक्छ । यसकालगि देश या स्थानको अंक र गृहस्वामीको अंकका आधारमा निर्णय गरिन्छ । मुहुर्त, कांकिणी, जमिनको आकार–प्रकार, रंग, गन्ध आदिको उचित शोधन अनिवार्य मानिन्छ ।

वास्तुशास्त्रले निर्माण स्थलको मापनलाई गहन अध्ययन गर्न सुझाउँछ । निर्माणस्थलको पिण्ड अथवा क्षेत्रफलको आधारमा त्यसलाई शुभाशुभ निर्णय गरेको हुन्छ । भूमिको पिण्ड र निर्माणको पिण्डबीचको सन्तुलन अनिवार्य मानिएको छ । पिण्डका आधारमा त्यस भूमिको फरकफरक लक्षणहरु हुन्छन् भन्ने वास्तुशास्त्रको मान्यता छ । देश, काल र गृहस्वामीका आधारमा त्यसको मापन गरी विधिसम्मत शुभमुहुर्तमा निर्माण गर्दा सवोत्तम हुन्छ ।

वास्तु व्यक्तिअनुसार फरक र शुभ अशुभ हुन्छ । एकका लागि अशुभ अर्काकालागि शुभ हुनसक्छ । विश्वकर्माकृत वास्तु या मयमत अथवा चाइनिज वास्तु या आधुनिक वस्तु सबैको मान्यता निवास या निर्माणस्थल जनहितकालागि तय गरिएको हुन्छ । पछिल्लो समयमा वास्तुशास्त्रका सिद्दान्तहरुलाई विज्ञानसम्मत जोडेर हेर्न प्रयाशहरु पनि भइरहेको छ । वैदिक वास्तुकै जगमा टेकेर आएका त्यसलाई प्रमाणित गर्ने कामहरु पनि भइरहेका छन् भने कहिँकतै आफ्ना नयाँ मत सिर्जना गर्ने प्रयाशसहरु पनि भइरहेका छन् । जे होस् वास्तु वैदिक कालदेखि नै थियो । त्यसलाई राजमहलहरुमा मात्र सीमित गराउने प्रयाशहरु भएपनि पछिल्लो समयमा हरेक मानिस यस शास्त्रबाट अधिकतम् लाभ लिन सक्ने अवस्थामा छन् । शास्त्रीय मान्यतालाई वैज्ञानिक आधारहरु खोज्दै अधिकतम सदुपयोग गर्दा केवल लाभ मिल्छ । तसर्थ आफ्नो घर, कार्यालय या अन्य निर्माणस्थललाई वास्तुशास्त्रसम्मत् बनाउँदै अधिकतम् लाभ उठाउनु जरुरी छ । वास्तुशास्त्रीय मान्यता अवलम्बन गर्दा लाभ मात्रै छ । कुनैपनि दृष्टिबाट हानी छैन । स्थान सानो होस् या ठूलो वास्तुसम्मत निर्माण संभव छ र अनिवार्य पनि छ ।